Nærbø-bonde frontar nasjonal kampanje

Synnøve Veien (34) bytta ut jobben i oljebransjen med jobb som heiltidsbonde ved årsskiftet. No er ho ein av fem bønder som frontar ein ny kampanje for Norges Bondelag.

- For meg var det eit verdival å bli bonde på heiltid i staden for å jobbe i olja. Eg var heldig som hadde denne moglegheiten og eg har ikkje angra, seier Synnøve Veien.

- Det kjennest bokstaveleg talt meir jordnært å vere bonde, og eg synst det er artig å få lov til å fronte yrket gjennom kampanjen Norge trenger bonden, seier ho.

- Krevjande å vere matfat og oljehovudstad

Kampanjen Norge trenger bonden er dratt i gang av Norges Bondelag i forkant av årets jordbruksoppgjer som startar på måndag. Synnøve Veien kjem opphaveleg frå Gloppen i Sogn og Fjordane og har budd på garden på Nærbø i 12 år. Mannen har drive mjølkeproduksjon, og ved årsskiftet bestemte ho seg for å ta over rugeeggproduksjonen på garden. Veien trur Rogaland er eit fylke som treng bonden meir enn nokon gong før.

- Det har vore krevjande for Rogaland å vere både matfat og oljehovudstad. For den einskilde som mister jobben som følgje av nedturen i oljebransjen er det sjølvsagt veldig vanskelig, men for samfunnet i sin heilskap trur eg det er sunt med ei endring, seier Synnøve Veien.

Godt landbruksmiljø i Rogaland

Ho skryt av det gode og driftige landbruksmiljøet i Rogaland.

- Eg opplever at det er mange positive bønder i Rogaland. Før eg bestemte meg for å seie opp jobben var eg i kontakt med mange som framsnakka kvardagen som bonde, og ga meg lyst til å satse. Eg kjenner meg heldig som hadde det valet, seier Synnøve Veien.

Ein annan som skryt av bøndene i Rogaland er leiar i Rogaland Bondelag, Ola Andreas Byrkjedal.

- Eg trur landbruket i Rogaland går ei god framtid i møte. Det er mange unge, dyktige bønder som tar over gardane og som satsar. Men det er viktig at også styresmaktene ser verdien av landbruket og tar omsyn til matjorda i planprosessar, understreker Ola Andreas Byrkjedal.

- Landbruket ein del av løysinga

Jordbruksoppgjeret mellom landbruket og staten startar på måndag. Byrkjedal håpar at regjeringa ser kva moglegheiter som ligg for verdiskaping i norsk landbruk, no når arbeidsløysa går opp.

-Rogaland og resten av Sørvestlandet opplever stor arbeidsløyse for tida. Dersom staten investerer meir i norsk landbruk og norsk matproduksjon , vil det gje moglegheiter for auka verdiskaping og nye arbeidsplassar innafor næringsmiddelindustrien og bygg- og anleggsbransjen. Landbruket må vere ein del av løysinga i nedgangstider, seier Ola Andreas Byrkjedal, leiar i Rogaland Bondelag.

Les meir om kampanjen Norge trenger bonden og Synnøve Veien på www.norgetrengerbonden.no

De andre bøndene som er med i kampanjen er

Lise Kaldahl Skreddernes (48), verdas nordlegaste mjølkebonde i Lebesby, Finnmark

Kjell Robert Schultz (32), sau-, korn- og grisebonde i Skaun, Sør-Trøndelag

Anne Strøm Prestvik (36), andelsbonde med økologiske grønsaker i Nittedal, Akershus

Thomas Meyer French (46), økologisk mjølkebonde og drivar av gardsbarnehage i Åmot, Hedmark

Kontakt:

Synnøve Veien tlf 958 40 560

Leiar i Rogaland Bondelag, Ola Andreas Byrkjedal tlf 920 26 833

Kommunikasjonsrådgivar i Norges Bondelag, Inger Johanne Sæterbakk tlf 958 00 060